परिचय

पु. ल. देशपांडे महाराष्ट्र कला अकादमीमध्ये आपले सहर्ष स्वागत आहे.

महाराष्ट्राला समृद्ध असा सांस्कृतिक वारसा लाभला आहे. शास्त्रीय आणि पारंपारिक कलांसोबतच चित्रकला, शिल्पकला इत्यादींसारख्या दृश्यकला तसेच नाटक, चित्रपट, छायाचित्र यांसारख्या आधुनिक कलांचे वैविध्यपूर्ण वैभव महाराष्ट्राला लाभले आहे.

महाराष्ट्राच्या ह्याच वारश्याचे जतन, संवर्धन आणि प्रसार करण्यासाठी महाराष्ट्र शासनातर्फे २ जुलै १९९१ रोजी “महाराष्ट्र कला अकादमी” ची स्थापना करण्यात आली. पर्यटन व सांस्कृतिक कार्य विभागाच्या अंतर्गत अकादमी कार्यरत असून कलांचे जतन-संवर्धन करणे, ‍विविध कलाक्षेत्रांतील कलाकारांना कार्यक्रमाच्या माध्यमातून उत्तेजन देणे, विविध कलाक्षेत्रांतील उदयोन्मुख कलाकारांसाठी शिबिरे, कार्यशाळा आयोजित करणे, संशोधन प्रकल्प राबविणे, ‍विविध महोत्सव, कार्यक्रम आयोजित करणे, आंतरराज्यीय सांस्कृतिक देवाण-घेवाण व्हावी याकरिता कार्य करणे ही महाराष्ट्र कला अकादमीच्या स्थापनेची प्रमुख उद्दिष्टे आहेत.

महाराष्ट्र भूषण सन्मानाने गौरविलेले पु. ल. देशपांडे हे महाराष्ट्राच्या साहित्य आणि कला क्षेत्रातील लाडके व्यक्तिमत्व. साहित्य, रंगभूमी,‍ दूरदर्शन, चित्रपट, संगीत, इ. क्षेत्रातील त्यांच्या अमूल्य योगदानासाठी सन्मान म्हणून ४ जुलै २००१ पासून “महाराष्ट्र कला अकादमी”ला पुलंचे नाव देऊन “पु. ल. देशपांडे महाराष्ट्र कला अकादमी” असे नामकरण करण्यात आले.